सिद्धबाबाको मुख्य सुरुङमार्गको ‘ब्रेक थ्रु’ माघ ११ गते, कहिलेदेखि गुड्छन् सवारी साधन ?

०४ माघ, काठमाडौँ । सिद्धबाबा सुरुङमार्गको मुख्य सुरुङ माघ ११ गते ‘ब्रेक थ्रु’ गरिने भएको छ । उक्त सुरुङमार्गको प्रधानमन्त्री केपी शर्मा ओलीले पूजाआजा गरी ‘ब्रेक थ्रु’ गर्ने आयोजनाका कृष्णराज अधिकारीले बताए ।

‘अब दुई मिटर खन्न बाँकी छ । ब्रेक थ्रु गर्नका लागि राखिएको छ । यसअघि माघको पहिलो सातालाई ब्रेक थ्रु गर्ने कार्यक्रम राखिएको थियो,’ अधिकारीले भने, ‘तर प्रधानमन्त्री ओलीको कार्य व्यस्तताका कारण माघ ११ मा ब्रेक थ्रु गर्न लागिएको छ ।’

अधिकारीकाअनुसार सोही दिन प्रधानमन्त्री ओलीले बुटवलको गोरुसिङ्गे–चन्द्रौटा सडकखण्डको शिलान्यास गर्ने कार्यक्रमसमेत छ । सो सडक ६ लेनमा विस्तार हुन लागेको छ ।

सिद्धबाबा सुरुङमार्ग पाल्पा जिल्लाको सिद्धार्थ राजमार्गको तिनाउ ३ दोभान क्षेत्रमा निर्माण गरिएको छ । यो आयोजनाअन्तर्गत २ लेनको मुख्य सुरुङमार्ग १ हजार ८९ मिटर लम्बाइको निर्माण गरिएको छ । यसको मुख्य सुरुङमार्गको चौडाइ साढे १० मिटर र उचाइ करिब ७ मिटर छ । लाइनिङसहित यो सुरुङमार्गको कुल लम्बाइ १ हजार १२६ मिटर छ ।

आयोजनाले उत्तर र दक्षिणतर्फबाट खन्दै सुरुङको बिचमा २ मिटरजतिको दुरी बाँकी राखेको छ । उत्तरतर्फबाट ४८० मिटर र दक्षिणतर्फबाट ६०७ मिटर गरी १०८७ मिटर सुरुङ खनिसकेको छ । सुरुङको उत्तर र दक्षिण भाग जोड्न २ मिटरमात्रै बाँकी छ । यही बाँकी २ मिटर माघ ११ गते खनेर प्रधानमन्त्री ओलीले ‘ब्रेक थ्रु’ गर्ने कार्यक्रम तय भएको अधिकारीको भनाइ छ ।

सुरुङमार्ग छिचोल्ने काम अन्तिम चरणमा पुगे पनि सुरुङभित्रको लाइनिङ र ‘स्लोप’ मिलाउन समय लाग्ने भएकाले सवारी गुडाउन एक वर्ष अझै लाग्ने आयोजनाले जनाएको छ ।
यो सुरुङमार्गमा सवारी साधन गुडिरहेको बेला आपातकालीन अवस्थामा यात्रुलाई उद्धार गर्न १५१ मिटरको पहिलो बाइवास, १६१ मिटरको दोस्रो बाइपास र १३० मिटर दुरीको तेस्रो बाइपास पनि निर्माण गरिएको छ ।

यसको पहिलो बाइपास सुरुङमार्ग २०८१ असोज ४ गते छिचोलिएको थियो । दोस्रो २०८१ पुस ७ गते र तेश्रो बाइपास २०८१ भदौ २६ गते छिचोलिएको थियो ।

मुख्य सुरुङमार्गमा समस्यामा परेमा यात्रुको उद्धार गरी तत्कालै उपचारका लागि लैजान सुरुङमार्गको उत्तर र दक्षिणपट्टी हेलिप्याडसमेत निर्माण गर्ने तयारी छ ।

कति निर्माण बाँकी ?

आयोजना प्रमुख अधिकारीका अनुसार हालसम्म सुरुङमार्ग खन्ने काम लगभग सकिएको छ । भौतिक प्रगति ३८.८५ प्रतिशत र वित्तीय प्रगति ३९.९० प्रतिशत सम्पन्न भएको छ । लाइनिङ, भेन्टिलेसनको काम भने अझै बाँकी छ ।

सुरुङमार्ग छिचोल्ने काम अन्तिम चरणमा पुगे पनि सुरुङभित्रको लाइनिङ र ‘स्लोप’ मिलाउन समय लाग्ने भएकाले सवारी गुडाउन एक वर्ष अझै लाग्ने आयोजनाले जनाएको छ ।

भित्तामा कङ्क्रेटिङ गर्ने, वाटर प्रुफिङ, सडक निर्माण, सुरुङभित्र ढलान, भेन्टिलेसन, लाइनिङ्ग, लाइटिङ, अक्सिजन, सुरक्षाका उपाय, आगो निभाउने यन्त्र जडानलगायतका काम गर्न बाँकी छ ।

म्यादभित्र निर्माण सकिएला ?

यो आयोजना २०७८ फागुनमा २५ गते ५ वर्षभित्र सम्पन्न गर्ने गरी ठेक्का सम्झौता भएको थियो । निर्माणको जिम्मा चिनियाँ कम्पनी चाइना स्टेट कन्स्ट्रक्सन इन्जिनियरिङ कर्पोरेसनले ७ अर्ब ३४ करोड २१ लाख रुपैयाँ मूल्य अभिवृद्धि कर(भ्याट) सहित लागतमा बनाउने ठेक्का सम्झौता गरेको थियो ।

ठेक्का शर्तअनुसार पहिलो फेजमा निर्माण सुरु भएको ५ वर्षभित्र अर्थात् २०८३ चैत ८ गते निर्माण सम्पन्न गर्नुपर्ने सम्झौतामा उल्लेख छ । यो सुरुङमार्ग २०८० पुसदेखि खन्ने काम सुरु गरिएको थियो । सम्झौताअनुसार यो सुरुङमार्ग अब १४ महिनाभित्र निर्माण सम्पन्न गरिसक्नु पर्ने छ । तोकिएको म्याद अघि नै निर्माण सम्पन्न हुने देखिएको आयोजना प्रमुख अधिकारी बताउँछन् ।

निर्माणकै क्रममा रहेकाले यो सुरुङमार्ग प्रयोग गर्ने सवारी धनीले के–कति सवारी शुल्क तिर्नुपर्ने वा नपर्ने विषय तय भएको छैन । सुरुङमार्गमा ६० किलोमिटर प्रतिघण्टाको दरले सवारी साधन गुडाउन पाइने व्यवस्था कायम गरिएको छ ।
‘अहिलेको गतिअनुसार काम भयो भने म्याद अघिनै निर्माण सम्पन्न हुन्छ,’ अधिकारीले भने, ‘नभए पनि तोकिएको म्यादभित्र निर्माणका सारा काम सकिने गरी कार्य भइरहेको छ । यो आयोजनामा म्याद थप गर्नुपर्ने अवस्था आउँदैन ।’

ठेक्का सम्झौताअनुसार यो सुरुङमार्ग निर्माण सकिएपछिको ५ वर्षसम्म निर्माण कम्पनीलाई नै सञ्चालन तथा मर्मत सम्भार गर्ने गरी अधिकार दिइएको छ । यो सुरुङमार्गको वारेन्टी ५ वर्षको छ ।

निर्माणकै क्रममा रहेकाले यो सुरुङमार्ग प्रयोग गर्ने सवारी धनीले के–कति सवारी शुल्क तिर्नुपर्ने वा नपर्ने विषय तय भएको छैन । सुरुङमार्गमा ६० किलोमिटर प्रतिघण्टाको दरले सवारी साधन गुडाउन पाइने व्यवस्था कायम गरिएको छ ।

सुरुङमार्ग सम्पन्न भएर सञ्चालनमा आएपछि पाल्पा, रुपन्देही, गुल्मी, अर्घाखाँची, रुपन्देही, स्याङ्जा, पोखरा, बागलुङलगायतका क्षेत्रमा सुरक्षित रूपमा यात्रा गर्न सहज हुने भएको छ ।