लगातार ३ दिन रेकर्ड बनाएको सुनको मूल्य बुधबार घट्यो
२० चैत, काठमाडौँ । गत आइतबारदेखि लगातार रेकर्ड बनाएको सुनको भाउ बुधबार भने घटेको छ । आज छापावाला सुन प्रतितोला ६०० रुपैयाँले घटेर १ लाख ७९ हजार १०० रुपैयाँमा कारोबार भइरहेको नेपाल सुनचाँदी व्यवसायी महासंघले जनाएको छ ।
गत आइतबार सुन प्रतितोलामा ६०० रुपैयाँले बढेर १ लाख ७६ हजार ८०० रुपैयाँमा कारोबार भएको थियो भने सोमबार १ हजार १०० रुपैयाँले बढेर १ लाख ७७ हजार ९०० रुपैयाँमा कारोबार भएको थियो । त्यसैगरी मंगलबार प्रतितोलामा १ हजार ८०० रुपैयाँले बढेर १ लाख ७९ हजार ७०० रुपैयाँमा कारोबार भएको थियो ।
त्यसैगरी, आज चाँदीको मूल्यमा पनि गिरावट आएको छ । आज चाँदी तोलामा १५ रुपैयाँले घटेर २ हजार २० रुपैयाँमा कारोबार भइरहेको छ । मंगलबार १ तोला चाँदी २ हजार ३५ रुपैयाँमा कारोबार भएको थियो ।
नेपालमा अन्तर्राष्ट्रिय बजारका आधारमा सुनको मूल्य निर्धारण गर्ने गरिएको छ । आज अन्तर्राष्ट्रिय बजारमा सुन प्रतिऔंस ३ हजार ११७.२४ अमेरिकी डलर र चाँदी ३३.८३ अमेरिकी डलरमा कारोबार भइरहेको छ ।
