नेपाल इन्फ्रास्ट्रक्चर्स इन्भेस्टमेन्ट फन्डको घाम ऊर्जा सेवामा रणनीतिक लगानी
२१ चैत, काठमाडौं । ग्लोबल इक्विटी फन्डद्वारा व्यवस्थित स्थायी पूँजी कोष ‘नेपाल इन्फ्रास्ट्रक्चर्स इन्भेस्टमेन्ट फन्ड लिमिटेड’ ले नेपालमा सौर्य ऊर्जा समाधानको अग्रणी प्रदायक कम्पनी घाम पावर नेपालको सहायक कम्पनी घाम ऊर्जा सेवामा रणनीतिक लगानी गरेको छ ।
यो लगानीले नेपालको नवीकरणीय ऊर्जा क्षेत्र अगाडि बढाउने र दिगो पूर्वाधार विकास प्रवर्द्धन गर्ने ग्लोबल इक्विटी फन्डको प्रतिबद्धतालाई जोड दिन्छ ।
घाम पावर नेपालको सहायक कम्पनी घाम ऊर्जा सेवाले ५ देखि २० वर्षको विद्युत खरिद सम्झौता (पीपीए) मोडेलमा व्यावसायिक र औद्योगिक संस्थाहरूलाई छतको सौर्य समाधान प्रदान गर्दछ ।
कम्पनीले सोल्टी होटल, सारस बेभरेजेज, गोर्खा ब्रुअरी, अरिहन्त इन्फ्रास्ट्रक्चर्स जस्ता दर्जनौ प्रतिष्ठित संस्थाका लागि छानामाथि अफ ग्रिड सौर्य परियोजनाहरू सफलतापूर्वक स्थापना गरेको छ ।
आर्थिक वर्ष २०८०/८१ सम्म कम्पनीको कुल स्थापित क्षमता ५.७ मेगावाट थियो, जुन चालु आव २०८१/८२ को दोस्रो त्रैमासिकमा ७.७६ मेगावाटमा विस्तार भएको छ ।
घाम ऊर्जा सेवाले पूँजीगत खर्चमा लगानी गरेर आफ्नो बजार उपस्थिति अझ बलियो बनाउने लक्ष्य राखेको छ, जसले गर्दा थप १०.२७ मेगावाटले आफ्नो क्षमता विस्तार हुनेछ । यो महत्वाकांक्षी वृद्धि प्रक्षेपणले घाम ऊर्जा सेवालाई नेपालको नवीकरणीय ऊर्जा बजारमा एक प्रमुख खेलाडीको रूपमा स्थापित गर्ने छ ।
कम्पनीको जोखिम न्यूनीकरण रणनीतिहरूले बजारको उतारचढाव र नियामक परिवर्तनहरू विरुद्ध लचिलोपन प्रदान गर्दछ र स्वच्छ ऊर्जा समाधानहरूको बढ्दो मागसँग तालमेललाई बढावा दिन्छ ।
ग्लोबल इक्विटी फन्ड र घाम ऊर्जा सेवाबीचको रणनीतिक साझेदारीले नेपाल स्वच्छ उर्जातर्फ अग्रसर भएको र बृहत आर्थिक वृद्धि र वातावरणीय दिगोपनलाई समर्थन गर्दछ ।
दिगो विकास उद्देश्यहरूसँग वित्तीय व्यवहार सन्तुलनमा राखेर यो सहकार्यले नेपालमा हरियाली र थप लचिलो ऊर्जा परिदृश्यलाई बढावा दिने ग्लोबल इक्विटी फन्डको प्रतिबद्धतालाई सुदृढ बनाउने छ ।
ग्लोबल इक्विटी फण्डका प्रबन्ध निर्देशक डा. मनिष थापाले घाम ऊर्जा सेवामा अफ ग्रिड रुफटप सौर्य परियोजना विस्तार गर्न फन्डको यो लगानीले स्वच्छ बिजुली उत्पादन गर्न, ग्रिडमा निर्भरता कम गर्न र अझ दिगो भविष्यमा योगदान पुयाउने कम्पनीको प्रतिबद्धता झल्किने बताए ।
उनले नेपालमा जलविद्युतको उल्लेखनीय सम्भावना भए पनि यसको वर्तमान ऊर्जा उत्पादनले उद्योगहरूको माग पूरा गर्न संघर्ष गरिरहेको बताए । जसले गर्दा डिजेल जेनेरेटरमा निर्भरता बढ्दै गएको र बारम्बार बिजुली कटौती भइरहेको उनको भनाइ छ । ‘यसले तिनीहरूको कार्बन फुटप्रिन्ट र सञ्चालन लागतलाई अझ बढाउँछ, जसले वातावरण र अर्थतन्त्र दुवैमा नकारात्मक प्रभाव पार्छ,’ उनले भने ।
घाम पावर नेपालका प्रमुख कार्यकारी अधिकृत (सीईओ) अञ्जल निरौलाले घाम ऊर्जामा ग्लोबल इक्विटी फन्डको यो लगानीले नेपाली उद्योगहरूलाई बिजुलीको लागि हरित विकल्पहरूमा परिवर्तन गरेर र सुरक्षित भविष्यका लागि दिगो अभ्यास अपनाएर समस्या समाधान गर्न सहयोग गर्न सकिने बताए ।
