दशैंअघि नै काठमाडौं-भरतपुर उडान गर्ने श्री एयरलाइन्सको तयारी
३० भदाै, काठमाडाैँ । श्री एयरलाइन्सले दशैंअघि नै काठमाडौं–भरतपुर उडान गर्ने तयारी गरेको छ । गत असार ६ गते काठमाडौं–भरतपुर परीक्षण उडान गरेको श्रीले ७२ सिटे एटिआर विमान भरतपुर उडाउने तयारी गरेको हो ।
परीक्षण उडान सफल भएसँगै काठमाडौं–भरतपुर व्यावसायिक उडान गर्न चाहेको श्री एयरलाइन्सका प्रबन्धक अनिल मानन्धरले जानकारी दिए । उनले दशैं अघि नै भरतपुरमा सेवा दिने गरी उडान अनुमति लिने प्रक्रिया अन्तिम चरणमा पुगेको जानकारी दिए ।
भरतपुर विमानस्थलको रनवे सानो भएका कारणले ७२ सिटे विमान आउन नसक्ने भनिएता पनि श्रीले ८० सिटे जहाजकै सफल परीक्षण उडान गरेपछि अन्य विमान कम्पनीहरू पनि भरतपुर आउन चाहेका छन् ।
काठमाडौं–भरतपुरको उडान बुद्ध एयरलाइन्सको ४२ सिटे जहाजले गर्दै आइरहेको थियो । बुद्धले अहिले भाडादर एकतर्फी मात्रै झन्डै ४७ सय लिंदै आएको छ । २० मिनेटमा भरतपुर काठमाडौं उडान गर्न सकिने भए पनि भाडा भने निकै महँगो पर्दै आएको छ ।
